A caschun dalla seduta da gievgia, ils 24 da november 2022 ha il Cussegl da scola Mustér elegiu Valeria Hendry per la secunda classa primara 23/24, Gionina Spescha per la tschunavla classa primara 23/24 e Regina Giger- Caminada sco pedagoga curativa da nossa scola. Per Valeria Hendry ei quei l’emprema plazza. Gionina Spescha e Regina Giger-Caminada ein da present engaschadas en autras scolas. Tuttas treis scolastas han fermas ragischs cun nossa vischnaunca ed han lur dimora cheu tier nus.
Il cussegl da scola ed il meinascola ein fetg cuntents e satisfatgs dallas treis elecziuns e selegran sin ina buna, constructiva e fritgeivla collaboraziun.
Cordial beinvegni Valeria, Gionina e Regina e bia plascher el cerchel scolastic Mustér!