Caras scolaras e car scolars, preziai geniturs
Sco nova menadra da scola da Mustér haiel jeu entschiet in viadi plein tensiun. Jeu sesentel veramein in tec sco en in ballun d’aria caulda: en vesta a novs horizonts sgulein nus cumineivlamein cun grondas spetgas e speronzas e vein gia suenter cuort temps absolviu in detg tschancun cun biaras novas impressiuns, biaras experientschas ed ideas.
Jeu entaupel mintga di scolaras e scolars, ch’empleneschan cun lur interess e marveglias nossa scola cun veta e colur. E duront miu temps d’entschatta astgel jeu sefidar sin las persunas d’instrucziun zun engaschadas che tegnan liber a mi il dies, per ch’jeu sappi emprender d’enconuscher tec a tec igl entir menaschi da scola.
Il grond inscunter da balluns sin nies maletg digl onn da scola 2023/24 muossa mintga classa cun la persuna d’instrucziun da classa. Quella meina – ensemen cun tụt ls persunas d’instrucziun dil menaschi – il ballun sil dretg cuors e procura, ch’ils scolars sgolan/emprendan a moda segira e cun finamiras claras. Vus geniturs emplenis ils balluns cun amur, sustegn ed encuraschament per vies affon. Ils scolars ein ils passagiers en nos balluns, mintgin cun sia premissa persunala, sia perspectiva unica e ses siemis. Nossa scola duei esser il liug, nua ch’ils scolars san – sco part d’ina cuminonza – sviluppar lur habilitads cun contonscher novas altezias e novas finamiras.
Nus vein gia uss viu entgins loghens interessants. Jeu sundel segira, che las meglieras vestas da quest onn da scola stattan aunc avon nus. Ensemen cun vus tuts less jeu nezegiar il vent – seigi el ruasseivels ni magari burasclus – il meglier pusseivel adina a favur dallas scolaras e dils scolars.
Cordials salids
Marina Cavelti-Mathiuet
menadra da scola
